Størri og rúmligari farstøð hjá Vága Floghavn

Verandi farstøð hjá Vága floghavn er ov lítil - serliga um summarið. Samstundis sum ferðafólkini gerast fleiri, er vorðið alsamt meira átrokandi við einari størri farstøð.

Hesa uppgávuna hava fýra toymir tikið á seg við hvør sínum verkætlanaruppskoti í kappingini um útbyggingina av Vága Floghavn.

Fyrrapart í dag varð kunngjørt, at SMJ saman við Kontrast Arkitekter, Zeso Kontrast, Spenn og Niras áttu vinnandi arkitektauppskotið.

Væntað verður, at ferðafólkatalið fer at økjast nógv næstu árini, og tí er neyðugt at fara undir útbyggingina sum skjótast, sigur Regin I. Jacobsen, stjóri í Vága Floghavn.