Trupult at vera til reiðar til óroynda støðu

Jens á Skipagøtu, sum bæði er málverjuvenjari og mentalvenjari hjá landsliðnum ásannar, at hóast nógva fyrireiking og prát um fyrsta EM-dyst, yvirtók fjálturin fyrstu løtuna.

Hann er tó sannførdur um, at um ikki arbeitt var frammanundan við sinninum og við teimum støðum, sum kundu koma fyri, so kundi dysturin enda við einum skrædli. Tað gjørdi hann ikki; ístaðin spældu Føroyar seg inn aftur í dystin

- Vit høvdu fyrireikað okkum væl til at spæla undir trýstinum og umstøðunum, men tað er ringt at fyrireika seg akkurát til støðuna. Men tað er heilt greitt fyri okkum, at tað, at vit hava arbeitt við tí mentala partinum, ger at vit koma afturíaftur, sigur Jens á Skipagøtu. 

 

Mugu góðtaka natúrligu menningarfetini

Føroyar hava yngsta landsliðið, sum er við til EM-endaspælið. Miðalaldurin er 23.01 ár. Tá ið eingin leikari heldur hevur staðið á so stórum palli áður, so verða villur gjørdar. 

- Vit vita, at føroyska kvinnulandsliðið kann spæla góðan hondbólt og at tær eru dugnaligir hondbóltsspælarar, men tær eru eisini øgiliga ungar og skulu royna seg á nýggjum pallum. Vit mugu bara góðtaka, at vit gera feilir og at vit ikki kunnu hoppa tey natúrligu menningarstigini um, sigur Jens á Skipagøtu. 
 

Nýggjur dagur og nýggj uppgáva

Í morgin skulu Føroyar royna seg móti stóru og sterku kvinnunum úr Kroatia. Venjarin væntar, at føroyska liðið nú fyri ein part hevur runnið EM-fjálturin av sær. 

- Nú hava spælararnir rist tann fyrsta nervøsitetin av sær, sigur Jens á Skipagøtu, sum samstundis væntar, at føroysku áskoðararnir fara at hoyrast betri í dystinum móti Kroatia, ið kann fara at gera ein mun.