- Tíðindi, mentan og ítróttur
Við Tórði á túri
Í Tjørnuvík vita tey ikki at siga frá so góðari vekt á lombunum úr haganum sum í ár, og lombini vóru nógv í tali.
74 ára gamli Steinbjørn Magnussen røktar Sjeynir, og 68 ára gamli Dávur Emil Hansen røktar hagapartin Ytsta Triðing. Teir hava báðir verið røktingarmenn í yvir hálvthundrað ár og teir vita ikki um nakað líknandi úrslit. Í Sjeyndum, har seyðurin einki fær afturat, vigaðu fleiri lomb omanfyri 50 pund, og har og í Ytra Triðingi vigaðu nógv lomb høgt í 40-unum.
Í sendingini verður eisini tosað við 95 ára gomlu Thoru Magnussen, sum greiðir frá skurðinum um heystið tá hon var ung, og tjørnuvíkingin Birgir Davidsen, sum býr í Hoyvík, men eigur eina hálvmørk í haganum í Tjørnuvík.
Við Tórði á túri
Tórður Mikkelsen vitjar bygdir og býir kring landið við mikrofonini og varpar ljós á gerandisdagin hjá fólki. Forvitnið er drívmegin og evni, ið ikki skapa yvirskriftir í miðlunum, hava mangan stóran týdning fyri fólkið á staðnum.
