Vinnuhúsið vil hava lendisætlan fyri Føroyar

Vinnufyritøkur spyrja javnan Vinnuhúsið, hvussu upplýsingar kunnu fáast til vega um lívmargfeldið í náttúruni, men trupult er at fáa tær til vega, tí føroyska náttúran er ikki skrásett til fulnar.  

Hetta segði Súsanna Berg, ráðgevi í burðardygd í Vinnuhúsinum, í 3. parti í útvarpsrøðini "Oyggjar undir trýsti".  

Niels Winther, stjóri, nevndi, at ein lendisætlan eigur at verða gjørd fyri Føroyar, so greitt verður, hvørji náttúruøkir kunnu takast til útbyggingar, og hvørji skulu verjast. 

- Tað føroyska lívmargfeldið er ikki nóg væl kortlagt. Um vit høvdu eina skráseting, har allar upplýsingar funnust, var lættari hjá fyritøkum at ansa eftir serligari náttúru, søgdu tey bæði.  

Planlóg og lendisætlan 

Niels Winther varð spurdur, um Vinnuhúsið tekur undir við, at ein serstøk lóg um árinsmetingar verður sett í gildi í Føroyum, eins og nevnt varð í 1. sending.  

Hann svaraði, at fyrst má ein fullfíggjað náttúruskráseting fyriliggja. Síðan kann gerast av, nær árinsmetingar skulu gerast í sambandi við verkætlanir.  

- Vinnuhúsið heldur, at alt, sum vit gera, skal vera burðardygt í longdini, so Føroyar eisini um 50 og 100 ár verða eitt land, sum vit øll hava hug at liva í, segði Niels Winther. 

Hann mælti til, at Føroyar fáa eina lendisætlan og eina planlóg, sum yvirskipað ásetir, hvar virksemi kann vera, og hvar náttúra skal verjast. 

- Vit síggja, at tað ber til at hava planlógir í londum, sum hava nógv fleiri kommunur enn Føroyar, so tað eigur eisini at bera til hjá okkum, segði hann. 

susanna_berg.jpg

Hvat áseta planlógir 

Ein planlóg er ein lóg um planlegging fyri alt landið.  

Fremst í teirri donsku stendur, at endamálið við henni er ”at tryggja samanhangandi planlegging, sum sameinir samfelagslig áhugamál í sambandi við lendisnýtslu, virkar fyri at verja náttúru og umhvørvi og skapar góðar karmar fyri vøkstri og menning í øllum landinum.” 

Hetta skal sambært lógini gerast, so samfelagsmenningin kann fara fram á burðardyggum grundarlagi við virðing fyri menniskjans livikorum, djóra- og plantulívi og øktari búskaparligari vælferð.