Trupla stríðið ímóti vinnuligum gangi

Í 2017 fór hon í barnsburðarfarloyvi, men tann góða tíðin gjørdist skjótt marrukend, tí ongantíð var friður heima av larmandi skipum. 

- Eg varnaðist, at grannaranir høvdu sama trupulleika. Vit fóru so í miðlarnir, og tá kom undan kavi, at gangur frá skipum var ein trupulleiki um alt landið, greiðir Trina Eysturoy frá í 3. sending í útvarpsrøðini ”Oyggjar undir trýsti”. 

Vórðu fatað sum vinnufíggindalig 

Felagið Heimafriður varð stovnað í 2018 at verja fólk ímóti ljóð-, ljós- og luftdálking, og vónin var, at kommunur og umhvørvismyndugleikin fóru at loysa trupulleikan skjótt og lætt.  

Men onki hendi, og tey í Heimafriði vendu sær tí til landsstýrið og fingu heilsukøn at siga, hvørja ávirkan gangur frá skipum hevði á sálarheilsuna hjá fólki.  

- Eg minnist, at landslæknin og Pál Weihe staðfestu, at hetta vóru ikki umstøður hjá fólki at liva undir, men vit fingu bara mótstøðu frá umhvørvismyndugleikanum, sigur Trina Eysturoy. 

Hon heldur, at tey í Heimafriði vórðu hildin at vera vinnufíggindalig.  

- Myndugleikar og føroyingar vóru fyri 8-10 árum síðan ikki vanir við, at fólk settu seg upp ímóti vinnuni. Vit vóru ikki ímóti vinnuni. Vit vildu bara geva fólki liviligar karmar at liva undir, sigur hon. 

Fleiri batar framdar 

Í 2022 varð ein kommunal reglugerð um gang í havnum sett í gildi, og tað var ein bati. Eisini hevur vinnan sjálv framt fleiri ábøtur. 

- Serliga hevur føroyski flotin framt batar. Eitt nú tað at strekkja veir úti á fjørðinum tók ein heilan dag fyrr. Í dag er hetta mær vitandi ikki ein trupulleiki ofta, sigur hon.  

Ein annar bati er, at skipini skjótari sløkkja motorarnar, og tey sløkkja eisini ljóskastararnar. Heldur ikki koma skipini til lands við fullari ferð longur.  

- Har eru nógvir batar framdir, men enn eru trupulleikar við t.d. gnístandi kranum, sigur Trina Eysturoy. 

Fekk harða mótstøðu 

Stríð hennara hevur verið tungt, tí sum konufólk, ið ikki hevði serliga vitan um skip og motorar, varð hon frá byrjan ikki tikin í álvara.  

- Eg setti meg væl inn í, hvussu motorar virkaðu, og hvussu gangur ávirkaði fólk, men tað var ikki nóg mikið, og tí hevði eg altíð ein mann við mær á fund. Hann nikkaði so, tá ið eg tosaði, sigur hon.  

Í summum førum var talan um maskinmeistarar, og onkuntíð var talan um menn, sum høvdu servitan um ljóð.  

Trina Eysturoy hevur verið fyri ágangi av tí, hon hevur sagt og gjørt, og tað harmast hon um. Hon vil tó ikki siga, hvussu ágangurin er framdur.  

- Tað er øgiliga óbehagiligt, og eg ynski tað ikki fyri nakran. Hevði eg vitað frammanundan, hvat eg skuldi verða útsett fyri, hevði eg neyvan gjørt tað, eg havi gjørt, sigur hon.