Viðgerðartrygd fyri fólk við rústrupulleikum er ikki gongd leið

Viðgerðartrygd í sambandi við rúsevni er ikki ráðilig, sum støðan er.

Ber ikki til at fáa viðgerð í Føroyum, hava fólk kanska rætt til viðgerð uttanlands, sum tað almenna skal gjalda.

Ella skal tað almenna við eini viðgerðartrygd gjalda privatum skipanum, sum so kappast við verandi viðgerðarstøð um starvsfólk.

Margit Stórá, landsstýriskvinna, hevur svarað Kristionnu Winther Poulsen, løgtingskvinnu, sum spurdi um viðgerðartrygd.

Ikki gongd leið

Margit Stórá heldur ikki, at viðgerðartrygd fyri fólk, sum eru bundin av rúsdrekka og rúsevnum, er gongd leið í Føroyum.

Í staðin eiga vit at skipa viðgerðartilboðini øðrvísi í  Føroyum og hava eitt meira fjøltáttað tilboð  við ambulantari viðgerð, sigur landsstýriskvinnan.

Hon hevur biðið at fáa lýst verandi viðgerðartilboð fyri at staðfesta, um brúk er fyri fleiri ambulantum  tilboðum, og um verandi viðgerðarstovnar veita neyðugu viðgerðina. 

Hendan lýsing er um at vera liðug.

Arbeitt verður eisini við at seta ein tvørfakligan bólk, sum skal lýsa, hvussu eitt rúsviðgerðartilboð til fólk við dupultum sjúkugreiningum skal skipast.