Berghol ein skilagóð íløga

Eitt berghol av Fútakletti til Vatnsoyrar ger størri nyttu enn tað kostar at gera og reka.

Tað sigur ein kostnyttu greining.

Fyribils útrokningar vísa, at Vatnsoyrarbergholið er ein skilagóð íløga. 

Tí er hetta ein lønandi íløga samanborin við verandi farleið gjøgnum Sandavág og Miðvág.

Ikki pengar nú

Tað sigur Ruth Vang, landsstýriskvinna, sum hevur svarað Jóhannisi Joensen, løgtingsmanni.

Hann spurdi um farleiðina til flogvøllin.  

Men, sum ikki einaferð, er stóri spurningurin pengar.

Talan er um stórar íløgur.

Og tað verður trupult at fáa játtan til at eina nøktandi farleið í Vágum næstu árini. 

Men vónandi ber til at fáa semju um langtíðarløguætlan, har farleiðin er við, sigur landsstýriskvinnan.

Út við 5000 bilar um samdøgrið

Ferðslan í Sandavági var í miðal 4.447 bilar um samdøgrið í 2024, og á Vatnavegnum var hon í miðal 3.595 bilar. 

Ferðslan var ávikavist 252 og 286 bilar størri í 2024 enn í 2022.

Átøk eru gjørd seinnu árini at bøta ferðsluviðurskiftini millum bygdirnar í Vágum og flogvøllin, sigur Ruth Vang.

Landsverk hevur arbeitt saman við kommununi um rundkoyring á Giljanesi, sigur hon í svari sínum.

Parturin hjá landinum er mettur kosta 15 mió. kr.

Í fíggjarlógini fyri 2026 eru 2,4 mió. kr. til at fyrireika berghol á farleiðini millum flogvøllin og  Vágatunnilin. Tær komu í lógina, tá uppskotið um fíggjarlóg var til triðju viðgerð.