Løgmaður: Tunnilin gjøgnum Traðarhamar kann broytast

Breið politisk semja er um, at Suðuroyartunnilin skal upp í Djúpadali, og farleiðin haðani kann framvegis broytast, sigur Aksel V. Johannesen um lógaruppskotið

Aksel V. Johannesen, løgmaður, hevur lagt nýtt uppskot um Suðuroyartunnilin fyri tingið.

Mynd: Bjarni Árting Rubeksen

Jón Brian Hvidtfeldt

12.12.2025 - 13:38

Tað snýr seg um eina heimild at brúka okkurt um 70 milliónir krónur til at fyrireika, projektera og bjóða út arbeiðið at gera Suðuroyartunnilin.

Tað sigur Aksel V. Johannesen, løgmaður, nú lógaruppskotið um Suðuroyartunnilin varð lagt fram í løgtinginum seint seinnapartin í gjár.

Í viðmerkingunum til lógaruppskotið stendur, at endamálið er at staðfesta politiska semju um at fara undir at fyrireika, prosjektera og bjóða út verkætlanina.

Samlaða verkætlanin er mett at kosta umleið 4,9 milliardir krónur í dagsins prísum.

Broytta linjuføringin í Sandoynni dýrkar verkætlanina umleið 70 milliónir, sammett við uppskotið, sum varð sent í almenna hoyring herfyri.

Endaliga prísin fyri samlaðu verkætlanina kennir tó eingin, fyrr enn arbeiðið er boðið út.

Samstundis sum lógaruppskotið um Suðuroyartunnilin varð lagt fram, kom eisini lógaruppskot um at hækka pensjónsaldurin upp í 69 ár fyri tingið.

Hoyr samrøðu við Aksel V. Johannesen í útvarpstíðindunum:

12122025_Aksel_um_tunnilin