MT Højgaard: Arbeiðið við H-bygninginum gjørt í tráð við prosjektið

MT Højgaard hevur gjørt sítt arbeiði í samband við H-bygningin á Landssjúkrahúsinum fult og heilt í tráð við prosjektið. Tað sigur Sven Klejs Mortensen, stjóri í P/f MT Højgaard Føroyum.

Men hann leggur afturat, at tilfarið ikki er hóskandi til geografisku staðsetingina

Í arbeiðnum at smíða H-bygningin á Landssjúkrahúsinum hevur MT Højgaard gjørt sjálvan bygningin og lokað hann inni. Alt annað hevur verið gjørt av øðrum arbeiðstakarum. 

Landsverk ætlar at stevna MT Højgaard

Í útvarpstíðindunum í gjárkvøldið upplýsti Landsverk fyri Kringvarpinum, at Landsverk er í gongd við umvælingar av H-bygninginum. Tær umvælingarnar eru í løtuni mettar at kosta meiri enn 33 milliónir krónur.

Landsverk ætlar sær eisini at stevna arbeiðstakaran MT Højgaard og "Faerport 2", sum bæði projekteraði og hevði fakliga eftirlitið við arbeiðnum.

Stjórin í P/F MT Højgaard Føroyum kennist ikki við ta upphæddina.
 

Bert 60 prosent í brúk

Í løtuni eru umleið 60 prosent av H-bygninginum í brúki, tí hann lekur so illa.

Sambært stjóranum í Sven Klejs Mortensen er brúkta tilfarið ikki eru egnað til geografisku staðsetingina.

Tó sigur hann, at MT Højgaard hevur gjørt arbeiðið í samsvari við fyriliggjandi prosjektið, og at bæði tilfar og arbeiði var góðkent so hvørt, sum tað var gjørt.

"Faerport 2", sum bæði projekteraði og hevði fakliga eftirlitið við arbeiðnum, er eitt íognarfelag, eitt samstarv, millum Selmar Nielsen arkitekt, SMJ verkfrøðingar og LBF, tað er Landsbyggifelagið