Sands kommuna: Eingin vegur gjøgnum bygdina til Suðuroyartunnilin

Tað er eitt krav frá Sands kommunu vegna alt fólkið, sum býr á Sandi, at eingin vegur verður gjørdur gjøgnum Sands bygd, frá Sandoyartunnlinum til Suðuroyartunnilin.

Tað stendur í hoyringarskrivinum frá Sands kommunu til lógaruppskotið um Suðuroyartunnil, sum hevur verið til hoyringar.

Sands kommuna metir, eins og bygdarfólkið, at besta loysnin er tann hjá alternativa tunnilsbólkinum, har tunnilin fer niður norðan fyri Múlan, upp í Skúvoy og so til Sandvíkar, skrivar kommunan.

- Hvat er vunnið við einari farleið til Suðuroynna, um hon ger stóran skaða á pláss, sum liggja á vegnum til Suðuroyar? verður spurt.

Sands kommuna skipaði 12. novembur fyri borgarafundi á Sandi í sambandi við uppskotið til Suðuroyartunnil.

Nógv fólk var møtt, og sambært hoyringarskrivinum var fundafólkið samt um, at skeivar avgerðir um linjuføring umvegis Sands bygd fara at hava vanlukkuligar fylgjur fyri bygdina, og harvið fyri oynna alla.

Sandur, bygdin á Sandi, Sands bygd

Heimsandsfólk vilja ikki hava vegin til Suðuroyartunnilin gjøgnum bygdina. 

Kommunan undrast á, at tað, at síggja til, verður farið so lætt um sjónarmiðini og ynskini hjá einari samdari Sands bygd.

Heimasandsfólk unna - enn sum áður - sera væl suðuroyingum eina trygga og góða farleið, men skilja samstundis ikki, at hugsað verður um at leggja vegin á Sandoynni á ein hátt, sum so stór mótstøða er ímóti á Sandi.

Les alt hoyringarskrivið her.

Kristian Oskar Henriksen

Kristian Oskar Henriksen, borgarstjóri í Sands kommunu. 

Klovin í tvey

Ein vegur gjøgnum Sands bygd fer millum annað at føra til, at bygdin verður klovin í tvey og fer eisini í stóran mun at forða fyri møguligum útbyggingum av bygdini í framtíðini.

Uppskotið, sum nú er lagt fram, har øll ferðslan fer gjøgnum bygdina umvegis rundkoyringar, fer at oyðileggja bygdina. Tunga ferðslan gjøgnum bygdina alt tíðarskeiðið, arbeitt verður, fer eisini at dálka illa og elva til ringt umhvørvi ta tíð, tunnilin er í gerð, og kommunan eins og bygdarfólkið mótmæla tí harðliga loysnini.

Sands kommuna biður um, at samráðingar sum skjótast verða tiknar upp við kommununa um eina skilagóða loysn fyri ferðsluna frá Sandoyartunlinum til Suðuroyartunnilin, og vísir annars til tey sjónarmið, sum vórðu førd fram í hoyringarskrivinum frá kommununi í desembur í fjør.

Hoyr samrøðu við Kristian Oskar Henriksen, borgarstjóra í Sands kommunu: