NRK kannar tíðindatilfar um álopið á kongressina

Avgerðin hjá Tim Davie, forstjóra, og Deborah Turness, tíðindastjóra, í BBC at siga seg úr starvi, tí tað í einari Panorama-dokumentarsending var manipulerað við upptøkum, hevur skakað fjølmiðlaheimin.

Norska kringvarpið boðaði í gjár frá, at stovnurin fer at kanna alt tilfarið, sum hevði við álopið á kongressina í Washington 6. januar 2021 at gera.

NRK, norska kringvarpið

NRK.

Sigurd Falkenberg Mikkelsen, uttanríkisredaktørur, sigur við heimasíðuna hjá NRK, at eftir tað, sum er hent í BBC, verður farið ígjøgnum tíðindaframleiðsluna í sambandi við tað, sum hendi 6. januar í 2021, við serligum atliti at røðuni hjá Donaldi Trump og álopið á kongressina.

- Tað er eitt stórt mál við nógvum innsløgum á nógvum pallum. Tá vit hugsa um tað, sum vit hava sæð nú, er eitt innslag frá Supernytt í januar 2023, sum NRK heldur skal broytast. Og tað verður gjørt í dag, sigur Sigurd Falkenberg Mikkelsen.