Trump: India gevst at keypa russiska olju

Russiski búskapurin stendur fyri einum stórum bakkasti, nú landið stendur at missa eina av sínum stóru inntøkukeldum.

Á tíðindafundi í gjárkvøldið í Hvítu Húsunum, segði Donald Trump, forseti, at hann hevði tosað við indiska forsetan, Narendra Modi. Tá skal indiski forsetin hava sagt, at India fer at gevast at keypa olju úr Russlandi.

Tað skrivar danska kringvarpið.

Er hetta veruliga so, fer tað at raka meint, tí í løtuni keypir India ikki minni enn 38 prosent av russisku ráoljuni.

Narendra Modi

Narendra Modi.

Vil hava enda á krígnum

Donald Trump forseti segði á tíðinafundinum, at hann ikki var serliga fegin um indiska handilin við Russland, tí hetta er við til at fóðra russisku krígsmaskinuna og harvið halda lív í krígnum í Ukraina.

- Eg vil hava enda á hasum krígnum, og eg eri alt annað enn fegin um, at India keypir russiska olju. Men indiski forsetin vissaði meg um, at landið ikki longur fer at keypa russiska olju, segði Trump á tíðindafundinum.

India hevur hvørki váttað ella avsannað tað, sum Donald Trump bar fram á tíðindafundinum í gjárkvøldið.