Múte stúrir ikki fyri hóttan um stevning

Múte B. Egede, fyrrverandi landsstýrisformaður í Grønlandi, missir ikki svøvnin, nú Tom Høyem, sum var grønlandsmálaráðharri frá 1982 til 1987, hevur hótt við stevna honum fyri ærumeiðing og bakbit, tí hann kallaði snyrlamálið fólkadráp.

Múte B. Egede skrivar á Facebook, at hann tekur ikki orðini hjá sær aftur.

Hann sigur, at hann skuldsetti danska statin fyri fólkadráp, ikki einstaklingar.

- Eg eri meira enn til reiðar til at taka tað, sum kemur, sigur hann.

- Tað ber ikki til at hótta meg til at tiga, skrivar hann eisini á Facebook.

Tom Høyem ætlar at stevna, tí hann heldur, hann hevur skyldu til at verja starvsfólkini í Grønlandsmálaráðnum.

Tom Høyem er einasti grønlandsmálaráðharri, sum er á lívi.