Thor Modi í føroysku skipaskrásetingina

Frálandaskipið Thor Modi hjá Thor, sum hevur verið undir Bahamaflaggi, er nú skrásett í Føroyum, í FAS, upplýsir Sjóvinnustýrið.

Og Tidan, sum er spildurnýtt farmaskip hjá svensku shippingfyritøkuni, Erik Thun, er eisini komið í FAS.

Altjóða føroysku skipaskrásetingin kom í 1992.

80 skip

Okkurt um 80 skip eru nú skrásett í henni. Sløk helvtin er føroysk skip. Føroyski parturin er vaksin nógv. Hann var 30 prosent í 2017.

FAS kom fyri at føroysk skip ikki skuldu noyðast at skráseta seg uttanlands. 

Men øll skip í FAS eru føroysk á tann hátt, at føroyskt partafelag eigur skipið.

Krøv verða herd

Landsstýrið ætlar at herða nøkur krøv í lógini um FAS.

Í løglistanum stendur, at lógin verður broytt soleiðis, at krøvini til eigarar vera í samsvari við altjóða skipaskrásetingar í grannalondunum.

Haraftrat verða fleiri skyldur lagdar á umboðsfólkini, tá skip verða skrásett í FAS. 

Uppskotið kemur í tingið í heyst.