Norska drotningin útskrivað í øllum góðum

Norski fjølmiðilin VG hevur givið norska kongshúsinum eina umbering, eftir at miðilin undir einum sjónvarpsinnslagi fyrr í dag boðaði frá, at Sonja drotning var deyð.

Hesi tíðindini lógu úti í nøkur sekund sum ein undirtekstur á skíggjanum, meðan eitt annað tíðindainnslag koyrdi.

"Hetta er eitt sera óheppið mistak, og vit eru sera kedd av hendingini. Vit hava beinleiðis biðið kongshúsið um umbering, og vit biðja eisini okkara hyggjarar um umbering", sigur tíðindaleiðarin á VG, Tora Bakke Håndlykken.

Norska kongshúsið boðaði fyrr í dag í tíðindaskrivi frá, at Sonja drotning er útskrivað av sjúkrahúsi, men er sjúkrameldað restina av vikuni.

87 ára gamla norska drotningin varð innløgd í gjár við andaneyð, men hevur tað gott aftur. Men alt, sum hon hevði á skránni hesa vikuna, er avlýst.

Í januar fekk Sonja drotning ein kvikil ísettan, eftir at hon fekk hjartatrupulleikar á eini skíðferð.

Sambært norska kongshúsinum hevði drotningin 236 almennar uppgávur í fjør, skrivar NRK.