Heathrow letur spakuliga upp aftur

Heathrow lufthavnin í London letur nú spakuliga upp aftur. Tað skrivar BBC.

Ætlanin er at nøkur flogfør fara avstað, og í morgin er lufthavnin fult virkin aftur.

Flogvøllurin stongdi fyrr í dag orsakað av eldsbruna og streymsliti í nátt.

Eldur kom í eina transformatorstøð í býarpartinum Hayes ikki langt frá Heathrow, og tað førdi til umfatandi streymslit í floghavnini.

Sambært Reuters vóru í minsta lagi 120 flogfør á veg til Heathrow, tá avgerð varð tikin um at stongja floghavnina, og hesi máttu øll beinast til aðrar floghavnir.

- Okkara toymi hava arbeitt ótroyttiliga síðani hendinga fyri at fáa alt í rættlag aftur. Vit fara nú at arbeiða saman við flogfeløgunum við at fáa ferðafólkini aftur, sum eru umbókað til aðrar flogvøllir í Evropa. Raðfesting er framvegis trygdin hjá ferðfólki og starvsfólki á flogvøllinum. Flogvøllurin hevur flest ferðafólk í Evropa, og hann brúkar eins nógva orku, sum ein lítil býur. Og tí tekur tað tíð at koma aftur í fullan og tryggan rakstur, sigur Heathrow-lufthavnin í tíðindaskrivi, sambært BBC.

Sambært FlightRadar24 eru í minsta lagi 1.351 flogferðir ávirkaðar av støðuni í dag.