Tyrluvanlukka í Russlandi kravt 22 mannalív

Øll tey 22 fólkini, sum vóru við tyrluni, sum datt niður á Kamtsjatka-hálvoynni í Russlandi í gjár, hava latið lív.

Tað siga russiskir miðlar í dag. Higartil eru 17 lík funnin, og leitingin eftir hinum fimm verður tikin upp aftur í morgin, siga russiskir miðlar.

Tyrlan, sum var av slagnum Mi-8, hvarv stutt eftir at hon var farin á flog við 19 ferðafólkum umborð umframt manningina, sum taldi trý fólk.

Enn er ikki greitt, hví tyrlan datt niður, men hon hvarv av radaranum bert fáar minuttir eftir at hon var farin avstað, uttan at manningin hevði boðað frá um nakrar trupulleikar. Seinni varð vrakið av tyrluni funnið á staðnum, har hon var horvin av radaranum.

Vrakið liggur í umleið 900 metra hædd í einum øki, sum er vælumtókt hjá ferðafólki. Landslagið á Kamtsjatka-hálvoynni er stórsligið og vilt við fleiri virknum gosfjøllum.

Ferðavinnufyritøkan Vityaz-aero átti tyrluna. Mi-8 tyrlurnar vórðu av fyrstan tíð gjørdar sum flutningstyrlur hjá sovjetska herinum.

Enn er einki komið út um orsøkina til, at tyrlan datt niður. Men sambært ukrainska miðlinum RBC-Ukraine er ikki talan um nakra vanlukku, men um morð. Miðilin skrivar, at millum ferðafólkini umborð vóru Arseniy Zamyatin, sum er fíggjarstjóri í russiska fótbóltssambandinum, og kona hansara.