Jóan Símun Edmundsson dagsins leikari í Vejle

Føroyski landsliðsvenjarin, Lars Olsen, kann fegnast, tí nógv bendir á, at áleyparin, Jóan Símun Edmundsson er í góðum formi.

Vejle tók í kvøld ímóti Lyngby, sum er næstovast í donsku 1.deild, og toftamaðurin legði Vejle á odda 1-0, tá 11 minuttir vóru farnir.

Stutt fyri hálvleik var Jóan Símun Edmundsson aftur í miðdeplinum, tá Philipp Rasmussen hjá Lyngby var útvístur fyri at sparka Jóan Símun.

Hóast Lyngby spældi við tíggju móti ellivu í seinna hálvleiki, eydnaðist tað teimum at javna til 1-1, tá 67. minuttir vóru farnir. 1-1 varð eisini endaliga úrslitið.

Jóan Símun Edmundsson spældi ein góðan dyst, tí áskoðararnir hjá Vejle valdu hann til dagsins leikara.

Hinir føroysku landsliðsleikararnir, Viljormur Davidsen og Sonni Ragnar Nattestad spældu eisini fyri Vejle í kvøld. Báðir vóru við frá byrjan.

Vejle er á sjeynda plássi í næstbestu donsku deildini við 22 stigum. Fimm stig eru niður til Brønshøj, sum er beint niðanfyri niðurflytingarstrikuni.